धनगढी–धनगढी प्रयोगशालामा मङ्गलवार गरिएको परीक्षणमा सुदूरपश्चिमका थप ३६ जनामा कोरोना भाइरसको सङ्क्रमण पुष्टि भएको छ। पछिल्लो २४ घण्टामा सेती प्रादेशिक अस्पतालमा ५ सय ४८ जनाको परीक्षण गरिएकोमा कैलाली, कञ्चनपुर, दार्चुला र डडेलधुराका गरी ३६ जनामा सङ्क्रमण पुष्टि भएको अस्पतालका सूचना अधिकारी दिलीपकुमार श्रेष्ठले बताए । आज धनगढी उपमहानगरपालिकाका २६ जनामा कोरोना भाइरसको सङ्क्रमण पुष्टि भएको छ। वडा नम्बर– १ र ५ का ५र५ जना, वडा नम्बर ८ का ४ जना, वडा नम्बर ३ का ३ जनामा सङ्क्रमण पुष्टि भएको हो । वडा नम्बर– ४, १२, १३ र १५ का दुई दुई जना, त्यसै गरी वडा नम्बर ६ का एक जनामा पनि सङ्क्रमण पुष्टि भएको छ ।
कैलालीकै लम्किचुहा नगरपालिका–३, गौरीगंगा नगरपालिका र स्थानीय तह नखुलेका एक एक जनामा समेत कोरोना पुष्टि भएको छ ।
कञ्चनपुरको कृष्णपुर नगरपालिकाका २ जना, त्यसै गरी महाकाली नगरपालिका–२, पुर्नवास नगरपालिका–१ र भीमदत्त नगरपालिका–१८ का एक एक जनामा भाइरसको सङ्क्रमण देखिएको छ।
दार्चुलाको नौ गाढ गाउँपालिका–२ र डडेलधुराको अजय मेरु गाउँपालिका– १ का एक एक जनामा पनि कोरोना पुष्टि भएको छ।
