धनगढी–सुदूरपश्चिम प्रदेशमा कोरोना सङ्क्रमितको सङ्ख्या बढ्दै गएको छ ।. प्रदेशका विभिन्न ५ वटा प्रयोगशालामा गरिएको परीक्षणमा १ सय ४२ जनामा कोरोना सङ्क्रमण पुष्टि भएको सामाजिक विकास मन्त्रालयले जनाएको छ । बिहीबार सेती प्रादेशिक अस्पतालको प्रयोगशालामा गरिएको परीक्षणमा ६९ जना,डडेलधुरामा गरिएको परीक्षणमा ४७ जना, बझाङमा ३ जना,अछाम कमल बजारमा ६ जना र डोटी अस्पतालको प्रयोगशालामा गरिएको परीक्षणमा १७ गरी १ सय ४२ जनामा सङ्क्रमण पुष्टि भएको सामाजिक विकास मन्त्रालयका स्वास्थ्य महाशाखा प्रमुख नरेन्द्र सिंह कार्कीले बताए । आज सबै भन्दा बढी कैलालीका ५६ जना सङ्क्रमित भएका छन् । त्यस्तै दार्चुलाका ३८ जना,डोटीका २७ जना,कञ्चनपुरका १२ जना,अछामका ६ जना र बझाङका ३ जनामा सङ्क्रमण पुष्टि भएको छ । यो सँगै सुदूरपश्चिममा कुल सङ्क्रमितको सङ्ख्या ८ हजार ४ सय ३८ पुगेको छ । ती मध्ये ७ हजार १ सय ८९ जना निको भएका छन् ।
प्रदेशमा अब १ हजार २ सय ३० जना सक्रिय सङ्क्रमित छन् । ती मध्ये सबै भन्दा बढी कैलालीमा ५ सय ७८ जना सक्रिय सङ्क्रमित छन् । विभिन्न अस्पतालमा १ सय ८ जना भर्ना भएका छन् । ११ जना सङ्क्रमितको अवस्था गम्भीर छ । उनीहरू मध्ये ३ जनाको भेन्टिलेटर र ८ जनाको आइसियुमा राखेर उपचार भइरहेको छ । हाल सम्म प्रदेशमा १९ जनाको मृत्यु भएको सामाजिक विकास मन्त्रालयले जनाएको छ ।
