धनगढी–धनगढी उपमहानगरपालिका–१२ जगेडामा रहेको अस्थायी प्रहरी पोस्टमा कार्यरत प्रहरी सहायक निरीक्षक (असई) गोविन्द बिकको हत्यामा संलग्नताको आशङ्कामा अनुसन्धानका लागी प्रहरीले १३ जना लाई पक्राउ गरेको छ ।
घटनाको अनुसन्धान र सोधपुछका लागी धनगढीका विभिन्न ठाउँबाट १३ जना लाई नियन्त्रणमा लिइएको जिल्ला प्रहरी कार्यालय कैलालीका प्रहरी नायब उपरीक्षक प्रतीक विष्टले बताए । प्रहरीका अनुसार उनीहरू मध्ये केही तस्करमा संलग्न व्यक्ति हुन । भारतबाट नेपाल तर्फ सामान तस्करी गर्नेहरुलेनै असई बिकको हत्या गरेको घटनाक्रमले देखाउँछ । त्यसैका आधारमा यस्ता गतिविधिमा संलग्न लाई पक्राउ गरी अनुसन्धान थालेको प्रहरीले जनाएको छ । शनिवार राती करिब आठ बजेतिर प्रहरी सहायक निरीक्षक बिक,प्रहरी जवान रामबहादुर साउदलाई लिएर सीमा नाकामा गस्तीमा खटिएका थिए । आइतबार बिहानसम्म पनि सम्पर्क विहीन भएपछि खोजी तीव्र पारेको प्रहरीले नेपाल भारत सीमा भएर बग्ने मोहना नदीमा तैरिएको अवस्थामा बिकको शव फेला पारेको हो । उनको घाँटीमा धारिलो हतियार प्रहार गरी हत्या गरिएको छ । घटनास्थलको प्रकृति हेर्दा शव भएको स्थान बाट करिब ५ सय मिटर टाढा उखुबारीमा हत्या गरी घिसारेर नदीमा फालेको प्रहरीको अनुमान छ । खुला नाकामा राति तस्कर समूहले उनको हत्या गरेको प्रहरीले जनाएको छ । विकसँगै ड्युटीमा रहेका प्रहरी जवान रामबहादुर साउदको अवस्था भने अहिले सम्म यकिन हुन सकेको छैन ।
