धनगढी– सशस्त्र प्रहरीले कैलालीको सीमा क्षेत्रमा कडा निगरानी गरेपछि तस्करहरुले भारतबाट भन्सार छलेर ल्याइएको अबैध सामान धमाधम पक्राउ पर्न थालेको छ । भारतसँग सीमा जोडिएको कैलाली जिल्लाका सीमावर्ती क्षेत्र वाट गएको चौमासिक अवधिमा अवैध रूपमा आयात निर्यात भएका ६६ लाख २१ हजार ९८१ मूल्य बरावरका विभिन्न सामान बरामद गरिएको छ ।
सशस्त्र प्रहरी बल नेपाल नं ३४ गण कैलालीको टोलीले सीमावर्ती क्षेत्रमा आयात निर्यात भइरहेको अवस्थामा बरामद गरेका यी समान भन्सार कार्यालयमा बुझाइएको छ । बरामद भएको मध्ये रु ५१लाख ९६हजार ४८१मूल्य बरावरको लत्ताकपडा, खाद्यान्न रासायनिक मल, हार्डवेयर,हरियो केराउ लगायतका समान रहेको कार्यालयका प्रमुख प्रहरी वरिष्ठ उपरीक्षक दीपेन्द्र कुँवरले बताए ।
यस्तै ११ लाख ५३हजार ५०० बराबरको अवैध काठ र काठ बोक्न प्रयोग भएका सवारी साधन समेत नियन्त्रणमा लिई डिभिजन वन कार्यालयमा बुझाइएको छ ।
दुई लाख ७२हजार बरावरका अवैध माछा र कुखुरा बरामद गरी नष्ट गरिएको छ । लागु औषध ब्राउन सुगर,खैरो हिरोइन, चरेस सहित यसको तस्करी र ओसार पसारमा संलग्न आठ जनालाई समेत पक्राउ गरिएको छ ।
सीमा क्षेत्रमा चोरी तस्करी जस्ता अवैध र अबाञ्छि गतिविधि पहिलेको भन्दा घटेका छन्,प्रहरी उपरीक्षक कुँवरले भने–थप सात ठाउँमा बिओपि स्थापना गर्न सकिएमा चोरी तस्करी जस्ता अवैध कार्य नियन्त्रण थप प्रभावकारी हुने छ ।
कैलाली जिल्लाको सीमावर्ती क्षेत्रमा आवश्यक थप सात ठाउँमा बिओपी थप्ने प्रक्रिया अघि बढेको जनाइएको छ ।
कैलाली जिल्लाको १०१ किमी सीमा भारतसँग जोडिएको छ । सीमा क्षेत्रमा हाल सशस्त्र प्रहरी बलको १२ ठाउँमा रहेका सीमा सुरक्षा पोस्ट (बिओपि)मार्फत नियमित गस्ती भइरहेको छ ।
अहिले सम्म प्रत्येक दश किलोमिटरको दूरीमा सशस्त्र प्रहरीको एक विओपि रहेकोमा अब प्रत्येक पाँच किलोमिटरको दूरीमा एक बिओपि स्थापना गर्ने प्रक्रिया अघि बढाउन लागिएको बताइएको छ ।
जिल्लामा रहेका सशस्त्र प्रहरीका चार वटा सुरक्षा बेसबाट राजमार्ग सुरक्षा प्रदान गर्ने कार्य भइरहेको छ । पछिल्ला महिनामा देखिएको कोभिड—१९को महामारीको समस्या उत्पन्न भएसँगै सीमा क्षेत्र वाट खटिएको सशस्त्रले सर्वसाधारणको आवागमन रोक्न अग्रपङ्क्तिमा रहेर काम गरिरहेको छ ।
फाइल तस्बिर
