धनगढी–नेपाल कम्युनिस्ट पार्टी नेकपाका स्थायी कमिटी सदस्य भीम रावलले नेकपा कुनै एक व्यक्तिले चाहेर मात्रै फुट्ने पार्टी नभएको जिकिर गरेका छन् ।
प्रेस सङ्गठन कैलालीले आज धनगढीमा आयोजना गरेको पत्रकार सम्मेलनमा बोल्दै नेता रावलले कसै एक व्यक्तिले भनेको आधारमा पार्टी फुट्ने नेकपा माटोको हाँडी नभएको बताएका हुन् ।
प्रक्रिया विना नै पार्टी फुट्छ भन्नु नै गलत कुरा भएको नेता रावलले बताए । कसैको व्यक्तिगत स्वार्थका लागि पार्टी फुटाउन नपाइनेमा उनको जोड छ ।
रावलले पार्टीका दुई अध्यक्षले अन्य नेताहरूलाई बेवास्ता गरेर अगाडी बढ्न नहुनेमा समेत जोड दिए ।
पार्टीभित्रको अन्तर्विरोधलाई लिएर अध्यक्ष द्वय केपी शर्मा ओली र पुष्पकमल दाहालले आ–आफ्नो कुरा मात्रै अगाडि सार्न नहुने भन्दै सबैका कुराहरू सुनुवाइ हुनुपर्ने उनको भनाइ छ ।
पार्टीको सुदूरपश्चिम इन्चार्ज समेत रहेका रावलले यसअघि आफूहरूले पार्टीलाई दिएको सुझावलाई नजर अन्दाज गर्न नहुने बताए ।
