धनगढी–अख्तियार दुरुपयोग अनुसन्धान आयोगले सरकारी कागजात किर्ते गरी कर्जा दुरुपयोग गरेको आरोपमा राष्ट्रिय वाणिज्य बैंक नेपालगन्ज शाखाका कर्मचारीसहित आठ जनाविरुद्ध भ्रष्टाचार मुद्दा दायर गरेको छ ।
अख्तियारले वाणिज्य बैंकका तत्कालीन प्रबन्धक ललितबहादुर शाही, सहायक कलबहादुर ओली क्षत्री, उपप्रमुख होताराम योगी, सहायक प्रिन्सी गुप्ताविरुद्ध एक करोड २५ लाख रुपैयाँ बिगो मागदाबी गर्दै मुद्दा दायर गरेको छ । उनीहरूमाथि किर्ते कागजातको मूल्यांकन गरी ऋण प्रवाह गरेको आरोप छ ।
यस्तै, ऋण लिने रिजवान अहमत जसगढ, सकिना जसगढ र फहमिदा बानो जसगढविरुद्ध पनि मुद्दा दायर गरेको छ । उनीहरूमाथि ७५ लाखदेखि एक करोड २५ लाख रुपैयाँ बिगो मागदाबी गरिएको छ । धितो मूल्यांकनकर्ता कर्णबहादुर के–केमाथि समेत एक करोड २५ लाख बिगो मागदाबी गर्दै मुद्दा दायर गरेको छ ।
