धनगढी– नेपालले सम्भावित खाद्य संकट टार्न थप १० लाख मेट्रिक टन धान आयातका लागि भारतसँग अनुमति माग्ने भएको छ ।
नेपालमा वार्षिक ५५ लाख टन धान उत्पादन हुने गरे पनि करिब १० लाख टन अपुग छ । यस वर्ष तराईमा रोपाई राम्रो हुन नसकेको र धानको उत्पादनमा असर पुग्ने देखेपछि सरकारले सजकता अपनाएको हो । धान निर्यातमा लगाएको प्रतिबन्ध फुकुवा गर्न र नेपालले खरिद गर्दै आएको कृषि उपजको कोटा बढाउन वाणिज्य मन्त्रालयले भारतसँग आग्रह गर्न लागेको हो ।
गत साता मुख्य सचिव वैकुण्ठ अर्यालको संयोजकत्वमा बसेको केन्द्रीय अनुगमन तथा मूल्याङ्कन समितिको बैठकमा खाद्यान्न व्यवस्थापनको विषयमा सबै उपाय अवलम्बन गर्नेबारे छलफल भएको थियो ।
कृषि तथा पशुपन्छी विकास मन्त्री वेदुराम भुसालले पनि गत बिहीबार धान चामलको निर्यात रोक्ने निर्णय लागू नगर्न नेपालस्थित भारतीय राजदूतलाई आग्रह गरेका थिए । दुई साताअघि भारतले धान चामलको निर्यातमा प्रतिबन्ध लगाएपछि व्यवसायीले आफूखुसी मूल्य बढाएका छन् ।
यता खाद्यान्न व्यवसायीले पनि धान, चामल, गहुँ, मकैलगायतका खाद्यान्न आयातमा सहजीकरण गरिदिन सरकारसँग आग्रह गर्दै आएका छन् ।
