धनगढी– नेकपा एमालेले सुदूरपश्चिम प्रदेश सरकारका मुख्यमन्त्री दीर्घ वहादुर सोडारीलाइ दिएको समर्थन आज फिर्ता लिएको छ ।
साथै सोडारी नेतृत्वको सरकारमा सहभागी तिन जना मन्त्रीहरूले पनि राजीनामा दिनुभएको छ । आर्थिक मामिला मन्त्री सुरेन्द्रबहादुर पाल, वन वातावरण तथा सहकारी मन्त्री वीर बहादुर थापा र आन्तरिक मामिला मन्त्री हीरा सार्कीले राजीनामा दिनुभएको हो । मुख्यमन्त्री सोडारी काठमाडौं भएका कारण मुख्यमन्त्री तथा मन्त्री परिषद्को कार्यालय र मुख्यमन्त्रीको सचिवालयमा राजीनामा पत्र र समर्थन फिर्ता लिएको पत्र बुझाइएको छ । यसैबिच एमालेले सरकार अब अल्पमतमा परिसकेकोले राजीनामा दिएर मार्ग प्रशस्त गर्न मुख्यमन्त्री लाइ आग्रह गरेको छ । नयाँ सरकार गठनका लागी छलफल अघि बढिसकेको र छिट्टै सरकार गठन हुने एमालेले जनाएको छ ।
दीर्घ सोडारी नेतृत्वको सरकारले ल्याएको बजेट पनि पास नगर्दै एमालेले राजीनामा दिएपछि बजेट अलपत्र परेको छ । आर्थिक मामिला मन्त्री सुरेन्द्रबहादुर पालले राजीनामा दिँदै सरकार अल्पमतमा परिसकेकोले अब बजेट पारित हुन नसक्ने भन्दै अब अध्यादेश मार्फत नयाँ बजेट ल्याइने बताउनुभयो । यस अघि रातो किताब नआउँदै बजेटको ई कपी सार्वजनिक भएको विषयमा छानबिन समिति गठन हुने उहाँको भनाइ छ ।
एमाले, नेकपा माओवादी केन्द्र, नागरिक उन्मुक्ति पार्टी रञ्जिता श्रेष्ठ समूह र एक जना स्वतन्त्र प्रदेशसभा सदस्यको समर्थनमा वैशाख ६ गते समाजवादी संसदीय दलका नेता सोडारी मुख्यमन्त्री नियुक्त हुनुभएको थियो । ५३ सदस्यीय सुदूरपश्चिम प्रदेशसभामा सरकार बनाउनका लागी २७ जनाको समर्थन चाहिन्छ । नयाँ वनेको गठबन्धनमा कांग्रेशका १८ र एमालेका ११ गरी २९ जना भएकाले सहजै सरकार बन्ने छ । सुदूरपश्चिममा कांग्रेश नेतृत्वमा सरकार बन्ने गरी छलफल भइरहेको नेताहरुको भनाइ छ ।
