धनगढी –सुदूरपश्चिम प्रदेश सभाको बैठकमा सरकारको तर्फबाट एक जना पनि मन्त्री सहभागी नभएर बैठक स्थगित भएपछि विपक्षी प्रदेशसभा सदस्यहरूले दिउँसै मोबाइलको टर्च बालेर सरकारको खोजी गरेका छन् ।
सोमबार दिउँसो आह्वान गरिएको बैठकमा सरकारका तर्फबाट एकजना मन्त्री पनि सहभागी नभएपछि सभामुख भीम वहादुर भण्डारीले बैठक स्थगित गर्नुभयो । लगत्तै प्रदेशसभा बाहिर आएर प्रदेशसभा सदस्यहरूले टर्च बालेर सरकारको खोजी गरेका हुन् ।
यस अघिको बैठकमा सरकारको निर्देशन विपरीत प्रदेशसभामा सहभागी भएको भन्दै भूमि व्यवस्था, कृषि तथा सहकारी मन्त्री टीका थापालाई बर्खास्त गरेका मुख्यमन्त्री दीर्घ बहादुर सोडारीले आज कसैलाई पनि सभामा पठाउनुभएन ।
प्रतिपक्षमा रहेका दल नेपाली कांग्रेस, नेकपा एमाले र नागरिक उन्मुक्ति रेशम पक्षका प्रदेश सभा सदस्यहले मोबाइलको टर्च लाइट बालेर सरकार खोज्दै चर्को आलोचना गरे । अल्पमतमा परी सक्दा पनि राजीनामा नदिएर सरकार र सदनलाई बन्धक बनाएको विपक्षीको आरोप छ ।
असार २० गते एमालेले समर्थन फिर्ता लिएपछि सोडारी नेतृत्वको सरकार अल्पमतमा परेको छ । बजेट समेत पारित नभएपछि सुदूरपश्चिममा साउन १ गतेदेखि बजेट शून्यताको अवस्था सृजना भएको छ । तर मुख्यमन्त्री सोडारीले राजीनामा दिन ढिलाइ गरिरहेका छन् ।
संवैधानिक व्यवस्था अनुसार ३० दिनभित्र विश्वासको मत लिने मुख्यमन्त्री सोडारीले बताएका छन् । उनीसँग बहुमत नभएकाले १८ गते भित्र सरकार छोड्नु पर्ने छ । ५३ सदस्यीय प्रदेशसभामा सरकार गठनका लागि २७ जनाको समर्थन चाहिन्छ । यहाँ कांग्रेसका १८ र एमालेका ११ गरी २९ जना प्रदेशसभा सदस्य भएकाले सहजै सरकार बन्ने छ ।
