काठमाडौं–वीर अस्पतालको नयाँ भवनको छैटौँ तलाबाट खसेर एक पुरुषको मृत्यु भएको छ ।
अस्पतालको नयाँ सर्जिकल भवनको छैटौँ तलबाट आज बिहान २ बजे ती पुरुष खसेको सीसीटीभी फुटेजमा देखिएको छ । मृतक पुरुषको हालसम्म पहिचान हुन नसकेको अस्पतालका सूचना अधिकारी सागर मिश्रले जानकारी दिए ।
ती पुरुषले आफूलाई बिरामीको कुरुवा भन्दै अस्पताल प्रवेश गरेका थिए । तर अस्पताल प्रशासनले उनका कोही पनि बिरामी अस्पतालमा नभेटेको जनाएको छ ।
उनको मृत्यु पछि कोही पनि आफन्त सम्पर्कमा नआएको जनाइएको छ । हाल उनको शवलाई पोस्टमार्टमका लागि त्रिवि शिक्षण अस्पताल लगिएको छ ।
छैटौँ तलामा रहेको खुला स्थानबाट उनले हामफालेको देखिएको सूचना अधिकारी मिश्रको भनाइ छ । प्रहरीले घटनाको अनुसन्धान गरिरहेको जनाएको छ ।
