बझाङ–मंगलबार बिहान आठ बजे डडेलधुराबाट बझाङ जाँदै गर्दा प्रेस युनियन आबद्ध पत्रकारहरूले सुदूरपश्चिमका आन्तरिक मामिला तथा कानुनमन्त्री पृथ्वीबहादुर सिंहलाई बाटैमा खादा लगाएर बधाई दिएका थिए । गृहजिल्ला जाँदै गरेका सिंहले भेटमा प्रेस युनियन डडेलधुराका अध्यक्ष योगेन्द्र रावललाई फर्किंदा पत्रकार सम्मेलनको आयोजना गरिदिनसमेत भनेका थिए ।
‘अहिले हतार छ । फर्किंदा यहाँ पत्रकार सम्मेलन आयोजना गरिदिनुहोला । बजेटबारे धेरै कुरा प्रस्ट गर्नु पर्ने छ भन्नु भएको थियो,’ रावलले भने । तर मन्त्री भएपछि पहिलो पटक गृहजिल्ला जाँदै गरेका सिंह सवार गाडी मंगलबार दिउँसो २ बजेतिर बझाङको केदारस्युँमा दुर्घटनाग्रस्त भयो ।
दुर्घटनामा मन्त्रीसहित उनकी पत्नी अमृता सिंह र भाउजू जयादेवी सिंहको समेत निधन भयो । भाउजू र पत्नीको घटनास्थलमै मृत्यु भएको थियो भने मन्त्री सिंहको उपचारका क्रममा कोहलपुरस्थित नेपालगन्ज मेडिकल कलेजमा मृत्यु भएको हो ।
मन्त्री सिंहले बझाङकै वित्थडचिर गाउँपालिकामा आयोजना भएको बधाई तथा शुभकामना कार्यक्रमपछि केदारस्युँको देउरामा पनि कार्यकर्तालाई भेट्ने कार्यक्रम थियो । पहिलो पटक जिल्ला आएका मन्त्रीलाई बधाई दिनका लागि जिल्ला सदरमुकामलगायत विभिन्न ठाउँमा कार्यक्रम आयोजना गरिएको थियो ।
मन्त्री जिल्ला आउने खबरले उत्साहित बनेका जिल्लावासीहरूमा दुर्घटनाको खबरले एकाएक स्तब्धता छाएको छ । ‘सुदूरपश्चिम सरकारमा पहिलो पटक बझाङले क्याबिनेट मन्त्री पाएकोमा खुसीले माला लगाउन भनेर हिँडेको थिएँ,’ देउराका व्यवसायी केस विष्टले भने, ‘दुर्घटना भयो भन्ने खबरले सबै उत्साहमा पानी खन्याएजस्तै भएको छ ।’
मन्त्री सिंह दम्पती र भाउजूको निधनले बझाङ जिल्ला नै शोकमग्न भएको छ । जिल्लामा मिलनसार व्यक्तिका रूपमा छवि बनाएका सिंहलाई अकास्मात गुमाउनुपर्दा अकल्पनीय क्षति भएको भन्दै सामाजिक सञ्जालका भित्ताहरूमा जिल्लावासीले शोक प्रकट गरिरहेका छन् ।
प्रतिनिधिसभा सदस्य भानुभक्त जोशीले जिल्लाले होनहार नेता गुमाएको बताउँदै दुर्घटनाको खबरले आफू स्तब्ध भएको बताए । यस्तै नेकपा एमालेका केन्द्रीय सदस्य ऐन महरले पनि जिल्लाले एक असल राजनीतिज्ञ गुमाएको बताए । सुदूरपश्चिम प्रदेशका सभामुख भीम भण्डारीले जनताले प्रिय नेता गुमाउनु पर्दा जिल्ला नै मर्माहत भएको र बझाङको राजनीतिले अपुरणीय क्षति भोग्नु परेको बताए ।
२०७९ सालको प्रदेशसभा निर्वाचन क्षेत्र नम्बर–१, बाट विजयी सिंह एक महिनाअघि जेठ ६ गते मन्त्री नियुक्त भएका थिए । २०७४ सालको प्रतिनिधिसभा निर्वाचनमा एमालेका भैरवबहादुर सिंहसँग पराजित भएका सिंह विद्यार्थी कालदेखि नै राजनीतिमा आबद्ध थिए । लामो समयदेखि चर्चित अधिवक्ताका रूपमा कानुन व्यवसाय गर्दै आएका सिंह २०३१ सालमा एसएलसी पास गरेलगत्तै नेपाल विद्यार्थी संघमा आबद्ध भएका थिए ।
२०३७ देखि २०४० सालसम्म नेविसंघ बाँकेको जिल्ला अध्यक्षका रूपमा काम गरेका उनी २०४१ देिख २०४८ सम्म कांग्रेस बझाङको जिल्ला सदस्य रहेका थिए । सिंह २०४८ देखि २०६० सालसम्म कांग्रेसको जिल्ला सचिव र पटक–पटक महाअधिवेशन प्रतिनिधि र महासमिति सदस्यसमेत भएका थिए ।
२०६२ देखि २०७३ सम्म लगातार दुई कार्यकाल कांग्रेस जिल्ला सभापति भएर संगठन चलाएका उनी २०४९ सालको स्थानीय निर्वाचनमा तत्कालीन लुयाटा गाविसको अध्यक्ष निर्वाचित भएका थिए । पेसाले कानुन व्यवसायी सिंहले परिआउँदा राजनीतिक पूर्वाग्रह नराखी सबैको काम गरिदिने नेताका रूपमा जिल्लामा लोकप्रिय छवि निमार्ण गरेका थिए ।
मन्त्री सिंहको जन्म २०१५ साल माघमा बझाङको कैलासमा भएको हो । सिद्धनाथ विज्ञान क्याम्पस महेन्द्रनगरको पहिलो ब्याचमा आईएस्सी उत्तीर्ण सिंहले बीए र बीएलसम्मको औपचारिक शिक्षा हासिल गरेका थिए ।
पत्नी अमृता सिंह पनि कांग्रेस राजनीतिमा सक्रिय थिइन् । २०७४ सालको स्थानीय तह निर्वाचनमा कांग्रेसबाट जयपृथ्वी नगरपालिकाको उपप्रमुख पदको उम्मेदवार थिइन् । सिंह दम्पतीका दुई छोराबुहारी र दुई नाति–नातिना छन् । कान्तिपुरवाट साभार
