धनगढी–क्षेत्रीय शहरी विकास आयोजना अन्तरका सडकहरू विस्तारका लागि धनगढीका घरधनीहरू सडक क्षेत्राधिकार भित्र पर्ने संरचनाहरू भत्काउन थालेका छन् ।
नगरका सडकहरू फराकिला बनाउनका लागि घरधनीहरू सडक क्षेत्राधिकार भित्र पर्ने पर्खाल, घर, टहराहरू भत्काउन थालेका हुन । बुधवार मात्रै धनगढी उप–महानगरपालिका वडा नं २ का ९ जना घरधनी र वडा नं ५ का ४ जना घरधनीले संरचना भत्काउन सुरु गरेका छन् । वडा नं २ मा निर्माण भइरहेको गुल्म–चर्च सडक १० मिटर फराकिलो बन्दै छ भने वडा नं ५ भएर निर्माण गरिने क्याम्पस रोड– चटकपुर सडक १६ मिटर फराकिलो बनाइँदै छ । घरधनीले संरचना भत्काउँदा नगर प्रमुख नृपबहादुर वड, उप–प्रमुख सुशीला मिश्र भट्ट, उप–महानगरका डिभिजन इन्जिनियर स्वयं उपस्थित भएर सडक क्षेत्र छुट्टाउने काममा सहयोग गरेका थिए ।
घरधनीहरू आफै घन, सावल लिएर संरचना भत्काउन थालेको नगरप्रमुख नृपबहादुर वडले बताए । नगरवासीले सडक बिस्तारका लागि गरेको सहयोगले क्षेत्रीय शहरी विकास आयोजनाहरू समयमै सम्पन्न हुनेमा ढुक्क छौँ,नगरप्रमुख वडले भने, स्थानीयको सहयोग बिना कुनै पनि ठाउँको विकास गर्न सकिँदैन । उप–महानगरपालिकाले सडक क्षेत्राधिकारमा पर्ने संरचना भत्काउने घरधनीलाई आदर्श नगरवासीको रूपमा सम्मान गर्ने,भत्काएको भागको नक्सा पासमा कर छुट गर्ने, सोही भागमा रंगरोगन गर्दा सहयोग गर्ने निर्णय गरेको नगरप्रमुख वडले बताए । धनगढी उप–महानगरपालिकाका उप–प्रमुख सुशीला मिश्र भट्टले धनगढीका नगरवासी विकासका लागि हातेमालो गर्छन् भन्ने सन्देश दिएको बताइन । उनले भनिन्, यस्तै सहयोग भए दोस्रो चरणका सडकहरू पनि चाडै निर्माण हुनेछन् ।
सडक विस्तारका लागि आफ्नो क्याम्पसको कम्पाउन्ड आफै भत्काएर सहयोग गरेका सुदूरपश्चिम एकेडेमीका सञ्चालन शुवास शाहीले नगरको विकासका लागि सहयोग पुगोस् भनेर आफैले संरचना भत्काउन सुरु गरेको बताए । ‘ सडक नगरवासीका लागि बन्दै छ , शाहीले भने, ‘ त्यसैले सडक क्षेत्राधिकारमा संरचना पर्ने घरधनीलाई सहयोग गर्न म अनुरोध गर्दछु ।’ नगर समृद्ध हुनका लागि नगरवासीको सहयोग आवश्यक रहने पनि शाहीले बताए ।
धनगढी उप–महानगरपालिका वडा नं ५ तारा नगरका गम्भीर सिंह बमले नगरको विकासमा कसैले अवरोध गर्न नहुने घर धनी बमले बताए । ‘क्षेत्रीय शहरी विकास आयोजना अन्तरगतको यो सडक १६ मिटरको बन्दै छ बमले भने, थोरै क्षेत्राधिकारमा मेरो संरचना पर्ने भएकाले मैले पक्की घर आफै भत्काउन सुरु गरेको छु ।
क्षेत्रीय सहरी विकास आयोजना अन्तर्गत पहिलो चरणमा ७ वटा सडक निर्माण हुने गरी २०७७ साल असार २८ गते सम्झौता भएको उप–महानगरपालिकाका डिभिनल इन्जिनियर दिजराज भट्टले बताए । उनले भने, जसमा गुल्म –चर्च रोड (२ हजार ७ मिटर) , धनगढी मेन रोड , ट्राफिक चौराहा देखि –कैलाली नाला ( १ हजार ३ सय ८० मिटर) , हुलाकी सडक–क्याम्पस रोड– जाखोरताल ( ७ सय मिटर) , क्याम्पस रोड– चटकपुर ( ३ हजार ६ सय ५० मिटर) , धनगढी – खुटिया स्याउले रोड ( ८ सय ७० मिटर ) , मालपोत रोड ( ४ सय ३० मिटर र हसनपुर रोड ( १ हजार १ सय ५० मिटर) रहेको छ ।
जसले आफ्नो घर आफै भत्काए
क्षेत्रीय शहरी विकास आयोजना अन्तरगतका सडकहरू बिस्तारको काम अगाडी बढ्ने भएपछि धनगढीमा बुधवार मात्रै एक दर्जन बढी घरधनीले संरचना भत्काउन सुरु गरेका छन् । उप–महानगरपालिमा सडक बिस्तारका लागि आफै संरचना भत्काउने आदर्श नगरवासी यी थिए ।
१) सुवास शाही, धनगढी उप–महानगरपालिका वडा नं २
२) जनकराज जोशी, उप–महानगरपालिका वडा नं २ ।
३) सुरेश बहादुर सिंह, उप–महानगरपालिका वडा नं २
४) जी.एम.स्लाम, उप–महानगरपालिका वडा नं २
५) सुरेश पन्त , उप–महानगरपालिका वडा नं २
६) मान बहादुर चौधरी, उप–महानगरपालिका वडा नं २ वडा सदस्य
७) किरण शाह उप–महानगरपालिका वडा नं २
८) अर्जुनबहादुर स्वाँर उप–महानगरपालिका वडा नं २
९) गम्भीर सिंह बम , धनगढी उप–महानगरपालिका वडा नं ५
१०) जोगराम चौधरी , धनगढी उप–महानगरपालिका वडा नं ५
११) हरी दत्त भट्ट , धनगढी उप–महानगरपालिका वडा नं ५
१२) बहादुर सिंह खत्री , धनगढी उप–महानगरपालिका वडा नं ५
