धनगढी–ललित भण्डारी, नेपाली राष्ट्रिय टिमले पछिल्लो समय पाएका एक उत्कृष्ट बलर हुन् । नेपालको जर्सीमा आफूलाई अब्बल सावित गरिरहँदा चोटग्रस्त ललित पुनरागमनको नजिक थिए । तर उनीमाथि अर्को बज्रपात आइलाग्यो, सडक दुर्घटना । उनी अहिले भन्छन्- सायद क्रिकेटकै लागि बाँचेजस्तो लाग्छ ।
ललित भदौ २८ गते महेन्द्रनगरमा मोटरसाइकल दुर्घटनामा परेका हुन् । उनले चलाएको मोटरसाइकललाई ट्रकले ठक्कर दियो । उनी गम्भीर घाइते भए । तत्काल धनगढीको एक अस्पतालमा पुर्याइए पनि चिकित्सकले बचाउन सकिंदैन भने । क्रिकेटर भएका कारण सबैको सहयोग पाए । उनलाई नेपालगन्ज हुँदै काठमाडौं लगेर दायाँ हात र खुट्टाको शल्यक्रिया गरियो । चार दिन भेन्टिलेटरसहित तीन साता अस्पतालमा बिताएका ललित अहिले निको हुने क्रममा छन् ।
चिकित्सकका अनुसार ललितलाई लागेको चोट निकै गम्भीर हो जसमा बाँच्ने सम्भावना एकदमै न्यून हुन्छ । तर चामत्कारिक रुपमा उनले नयाँ जीवन पाए । यसमा खुशी नहुने कुरै भएन । उनी दुर्घटनामा बायाँ हात जोगिएकामा अझ बढी खुशी छन् । किनभने त्यहि हातको जादुले उनी क्रिकेटरका रुपमा चिनिएका हुन् । चिकित्सकले एक वर्षमा खेल्न सक्ने आश्वासन दिएकाले उनी मैदानमा र्फकने दिनको प्रतिक्षामा छन् ।
घरेलु फ्रेन्चाइजी लिगमा २८ वर्षीय ललितलाई आफ्नो टिममा लिन प्रतिस्पर्धीबीच हानाथाप जस्तै हुन्छ । धनगढी प्रिमियर लिग, पोखरा प्रिमियर लिग र एभरेस्ट प्रिमियर लिगमा उनले उत्कृष्ट प्रदर्शन गरेका थिए । उनलाई राष्ट्रिय टिममा महबुब आलम पछिको उत्कृष्ट बायाँ हाते तीव्र गतिका बलरको रुपमा हेर्ने गरिन्छ । नेपालले दुई वर्षअघि नेदरल्यान्डसविरुद्ध ऐतिहासिक पहिलो एकदिवशीय खेल जित्दा ललितले महत्वपूर्ण दुई विकेट लिएका थिए । खुट्टामा चोटका कारण उनी एक वर्षयता भने मैदान बाहिर थिए ।
ललितले भयानक दुर्घटनाबाट बाँच्नुलाई क्रिकेटको दोस्रो इनिङका रुपमा लिएका छन् । पूर्णरुपमा निको भइ उनले राष्ट्रिय टिममा पुनरागमन गर्न सक्छन् सक्दैनन् त्यो भविष्यमा देखिनेछ ।
