धनगढी–कैलालीको सीमा क्षेत्रमामा खटिएका दुई सुरक्षाकर्मीको हत्यापछि सुदूरपश्चिम प्रहरीले नाकाको सुरक्षा व्यवस्थामा विशेष सतर्कता अपनाएको छ । उत्तर पश्चिममापर्ने दार्चुलादेखि कैलालीसम्मका प्रहरी युनिटमा जनशक्ति थपिएको छ भने विशेष परिस्थितिमा हुने गस्ती र पेट्रोलिङमा सशस्त्र प्रहरी तथा काउन्टर पार्टसँगको समन्वयलाई पनि बढाइने भएको छ ।
गत कार्तिक १ गते राति धनगढीको घुइयाघाटमा गस्तीमा खटिएका नेपाल प्रहरीका सहायक निरीक्षक गोविन्द विक र जवान रामबहादुर साउँदको तस्करहरूले बीभत्स हत्या गरे । हत्या हुँदा सीमाको पहिलो घेरामा खटिएको सशस्त्र प्रहरीले सुइँकोसम्म पाएन । दुई सुरक्षा संयन्त्रबीचसमन्वय अभाव देखिएपछि अहिले सीमावर्ती क्षेत्रमा हुनसक्ने आपराधिक गतिविधि विरुद्ध विशेष सावधानी अपनाउँदै कडाइ गरिएको सुदूरपश्चिम प्रदेश प्रहरी कार्यालयका प्रहरी वरिष्ठ उपरीक्षक मुकेश सिंहले बताए ।
सुदूरपश्चिमको दार्चुला,बैतडी,डडेलधुरा, कैलाली र कञ्चनपुरको करिब ४ सय ८६ किलोमिटर भू–भाग भारतसँग सीमा जोडिएको छ । यी क्षेत्रमा नेपाल प्रहरीका ४० वटा प्रहरी इकाई छन् । जहाँ ५ सय ३३ जना सुरक्षाकर्मी खटिएका छन् । त्यस्तै सशस्त्र प्रहरीका ४१ बिओपीमा १ हजार ३५ प्रहरी खटाइएको छ । नाकामा खटिएका प्रहरीसँग पर्याप्त बन्दोबस्तीका सामान छैनन् । अधिकांश प्रहरी त्रिपालमुनि छन् । आफै स्रोत साधन र पूर्वाधार अभाव झेलिरहेका सुरक्षा निकायलाई अन्तर्देशीय सङ्गठित अपराधदेखि लागू औषध, मानव तस्करी तथा सीमा क्षेत्रमा हुने गैर कानुनी गतिविधि रोक्न चुनौती छ वरिष्ठ प्रहरी उपरीक्षक सिंहले भने त्यसका बाबजुद पनि हामी सक्रिय रूपमा सीमामा खटिएका छौँ ।
नेपाल–भारत सीमा नाका पुरै खुला छ । पहाडी जिल्लामा अझ भौगोलिक कठिनाइका कारण सबै ठाउँमा सुरक्षा तैनाथी छैन । अधिकांश आपराधिक घटना रोकथाम तथा नियन्त्रणका लागी सबै भन्दा ठुलो चुनौती खुला सीमा हो । तसर्थ, सुरक्षामा खटिएका प्रहरीलाई व्यवस्थित बनाउन सके मात्रै सीमा नाकामा हुने अपराध नियन्त्रण हुने सुरक्षा अधिकारीको ठम्याइ छ ।
