कञ्चनपुर–कञ्चनपुरको भीमदत्त नगरमा क्याप्टेन वेद उप्रेती ट्रस्टद्वारा निर्माण गरिएको स्टेच्यू अफ सिद्धनाथ बाबा र म्युजियम परिसर आजबाट खुला गरिएको छ । क्याप्टेन वेद उप्रेती ट्रस्टका अध्यक्ष तथा सञ्चालक क्याप्टेन वेद उप्रेतीले आज एक विज्ञप्ति प्रकाशित गरी स्टेच्यू अफ सिद्ध नाथ बाबा र म्युजियम परिसर सबै नागरिकका लागी खुला गरिएको बताएका छन् ।
विगत सात वर्षदेखि निर्माणाधीन यो म्युजियम २०७७ वैशाख महिनादेखि सञ्चालनमा ल्याउने लक्ष्य भए पनि लकडाउनका कारण निर्माण कार्य ठप्प हुँदा समयमै सञ्चालनमा ल्याउन नसकिएको उप्रेतीले बताए । फोटो खिच्ने, टिक टक बनाउने युवायुवतीहरूले निकै दबाब दिएपछि निर्माणाधीन म्युजियम बाहेक स्टेच्यू अफ सिद्ध नाथ बाबा र म्युजियम परिसर खुला गरिएको उनको भनाइ छ ।
यसअघि क्याप्टेन वेद उप्रेती ट्रस्टद्वारा धनगढीमा एअर क्राफ्ट म्युजियम र काठमाण्डौंमा एभिएसन म्युजियम सञ्चालनमा छ ।
ट्रस्टले तेस्रो प्रोजेक्टका रूपमा काठमाण्डौं र धनगढीको म्युजियम भन्दा यो म्युजियम पृथक् खालको रहेको उनको भनाइ छ । यस म्युजियम भित्र रहेको अप्स एन्ड डाउन म्युजियम सेक्सन नेपालकै पहिलो म्युजियम हुनेछ ।
म्युजियम परिसर बाहिर स्टेच्यू अफ सिद्ध नाथ बाबा, स्विमिङ पुल, नौ धारा, हेलिकोप्टर र सुदूर पश्चिमका पर्यटकीय स्थलहरूका हवाई चित्रहरू रहेका छन् ।
म्युजियम भित्र अप्स एन्ड डाउन, थ्रिडी र ईलुजन सेक्सनहरू छन् । खास गरी युवायुतीहरुलाई लक्षित गरेर बनाइएको म्युजियम धार्मिक दृष्टिकोणले पनि मुख्य भूमिका खेल्नेछ । सिद्ध नाथ बाबाको जटाबाट निस्किने पानीको फोहोरा र विभिन्न देवीदेवताका सालिकहरूले सबैलाई आकर्षित गर्नेछन् ।
यस म्युजियमले विद्यार्थीहरूलाई प्रेरणा, सिद्ध नाथ बाबाको दर्शन पश्चात् पाइने सन्तुष्टि, युवाहरूलाई थ्री डी र अप्स एन्ड डाउनको आकर्षण र गर्मीमा याममा नौ धारा सहितको स्विमिङ पुल र हेलिकोप्टर भित्र बसी जो कोहीले खिच्न पाउने फोटो ग्राफको अवसरले यो म्युजियम सुदूर पश्चिमको मुख्य पर्यटकीय स्थल बन्ने छ ।
यस म्युजियमका लागि माता सरस्वती उप्रेती र क्याप्टेन वेद उप्रेतीले वेद उप्रेती ट्रस्टका लागि जग्गा दान दिएका छन् । जग्गाको मूल्य करिब तीन करोड रुपैयाँ र म्युजियमको निर्माणमा चार करोड रुपैयाँ समेत गरी करिब सात करोड रुपैयाँको लागतमा यो म्युजियम निर्माण भएको हो । म्युजियम निर्माण गर्न क्याप्टेन वेद उप्रेतीले विदेशमा प्रशिक्षक पाइलटको जागिर वाट आर्जन गरेको चार करोड रुपैयाँ लगानी गरेका छन् । अमूल्य जग्गा दान र म्युजियम बनाउन हौसला प्रदान गर्ने माता सरस्वती उप्रेतीको म्युजियम परिसर भित्र सालिक बनाइएको छ ।
हाल फैलिएको कोरोना भाइरसको सङ्क्रमण कायम रहेसम्म महेन्द्रनगर म्युजियमको भित्री भाग भने बन्द रहनेछ । तर स्टेच्यू अफ सिद्ध नाथ बाबा र हेलिकोप्टर भित्रको फोटोग्राफी र म्युजियम परिसर बाहिर कोभिड– १९ बाट उच्च सतर्कता अपनाएर फोटो खिच्न सिद्ध नाथ बाबा दर्शनर्नार्थ बिहान १० बजेदेखि साँझ ५ बजेसम्म खुला गरिनेछ ।
७० वर्षभन्दा माथिका ज्येष्ठ नागरिकलाई म्युजियम प्रवेश निःशुल्क गरिएको छ । अन्यको हकमा प्रवेश शुल्क रु ५० निर्धारण गरिएको छ । म्युजियम पूर्ण रूपमा सञ्चालनमा आइसकेपछि भने विद्यार्थीहरूका लागि रु १०० र अन्यका लागि रु १५० प्रवेश शुल्क निर्धारण गरिने उप्रेतीले बताए ।
