धनगढी–धनगढीको घुइयाघाट सिमानाकामा गस्तीमा खटिएका प्रहरी हत्यामा संलग्न रहेको अभियोगमा जिल्ला प्रहरी कार्यालय कैलालीको थुनुवा कक्षमा रहेका एक जना अभियुक्तलाई कोरोना सङ्क्रमण पुष्टि भएको छ । सेती प्रादेशिक अस्पतालको प्रयोगशालामा एक साता अघि गरीएको परिक्षणमा उनलाई सङ्क्रमण पुष्टि भएको जिल्ला प्रहरी कार्यालय कैलालीले जनाएको छ । उनी अहिले प्रहरी कार्यालय भित्रैको आइसोलेसनमा छन् । उनलाई सङ्क्रमण भएकै कारण प्रहरी हत्याको मिसिल तयार भए पनि प्रहरीले अदालतमा उपस्थित गराउन सकेको छैन । १४ दिन पुगेपछि उनको परीक्षण गर्ने र रिपोट नेगेटिभ आएपछि अदालतमा उपस्थित गराउने प्रहरीको तयारी छ । गत कार्तिक १ गते राती नियमित गस्तीमा खटिएका बेला अस्थायी प्रहरी पोस्ट जगेडाका इन्चार्ज प्रहरी सहायक निरीक्षक गोविन्द बिक र जवान राम बहादुर साउदको उनी लगायत तस्कर समूहले हत्या गरिएको थियो ।हत्यामा संलग्न भएको अभियोगमा प्रहरीले ८ जनालाई पक्राउ गरिसकेको छ ।
यसै बिच जिल्ला प्रहरी कार्यालयको थुनुवा कक्षमा रहेका अन्य १६ जनालाई पनि सङ्क्रमण देखिएको थियो । ती मध्ये १३ जनाको रिपोट नेगेटिभ आइसकेको प्रहरीले जनाएको छ ।
