धनगढी–धनगढीमा उपचारका क्रममा शुक्रवार मृत्यु भएका दुई जना कोरोना सङ्क्रमितको कैलालीको गोदावरी घाटमा नेपाली सेनाले अनतेष्टि गरेको छ । तेघरीमा रहेको श्री भवानी दल गण बाट सह सेनानी नबल सिंह रोकायको कमान्डमा खटिएको टोलीले सुरक्षाका सबै उपाय अपनाउँदै मृतकका आफन्त र स्थानीयको उपस्थितिमा हिन्दु संस्कार अनुसार जलाएर अनतेष्टि गरेको गणका प्रमुख सेनानी विकास केसीले जानकारी दिए ।
धनगढी उपमहानगरपालिका–५ निवासी ५५ वर्षीय पुरुषको आज अपराह्न १२ बजे उपचारका क्रममा अस्पतालमा मृत्यु भएको थियो । श्वासप्रश्वास सम्बन्धी समस्या देखिएपछि गत कार्तिक २५ गतेबाट सेती प्रादेशिक अस्पतालको कोभिड अस्थायी अस्पतालको भेन्टिलेटरमा उनको उपचार थालिएको थियो । उनमा डायबिटिज रोगको समेत समस्या थियो ।
यस्तै गौरीगंगा नगरपालिका वडा नम्बर ७ की ७५ वर्षीया महिलाको बिहान १० बजेर २५ मिनेटमा अस्पतालमा मृत्यु भएको थियो । गत कार्तिक २९ गतेबाट सेती प्रादेशिक अस्पतालको कोभिड अस्थायी अस्पतालको भेन्टिलेटरमा उनको उपचार थालिएको थियो । उनी मिर्गौला सम्बन्धी रोगबाट समेत ग्रसित रहेको अस्पतालका सूचना अधिकारी दिलीपकुमार श्रेष्ठले जानकारी दिए । यो सँगै सुदूरपश्चिम प्रदेश भित्र मात्रै कोरोना सङ्क्रमणका कारण आज सम्म ३५ जनाको मृत्यु भएको सामाजिक विकाश मन्त्रालयका प्रवक्ता नरेन्द्र सिंह कार्कीले बताए ।
