धनगढी–बहुप्रतिक्षित क्षेत्रीय शहरी विकास आयोजना अन्तर्गतका सडकहरुको निर्माण कार्य बिहीबार बाट धनगढीमा सुरु भएको छ ।
परियोजनाको यो नगरप्रमुख नृपबहादुर वड र उप–प्रमुख सुशीला मिश्र भट्टले क्याम्पस गेट– चटकपुर सडकको शिलान्यास गरेसँगै सडक निर्माणको काम अगाडी बढेको छ । धनगढीलाई स्मार्ट सिटीको रुपमा विकास गर्ने कार्यक्रमको रुपमा यो परियोजनालाई लिइएको छ । धनगढीका बाहिरी सडकहरू बिस्तार तथा कालोपत्रे बनाई सक्दा पनि क्षेत्रीय शहरी विकास परियोजनाको पर्खाईमा मुख्य बजार क्षेत्रका सडक बिस्तार गर्न सकिएको थिएन । एसियाली विकास बैंकको सहयोगमा सञ्चालन भइरहेको क्षेत्रीय शहरी विकास आयोजना अन्तरगत धनगढी उपमहानगरपालिकामा ४२ किलोमिटर सडक बिस्तारकालागि २०१५ मा सम्झौता भएको थियो । सम्झौता भएको भएको लामो समय हुँदा पनि सडक निर्माणको काम अगाडी बढ्न सकेको थिएन , नगरप्रमुख वडले भने, ‘आज निकै खुसी छु सपनाको परियोजनाले काम सुरु गरेको छ ।’
सन् २०१५मा छुट्टाइएको एक अर्ब ३५ करोड रुपैयाँ बजेट अपुग हुने भएकाले सडक निर्माणको काम चरणवद्धरुपमा हुने नगरप्रमुख वडले बताए । पहिलो चरणमा साढे १० किलोमिटर सडक निर्माणको काम सुरु भएको छ, नगरप्रमुख वडले भने, अव चाँडै दोस्रो चरणका सडक निर्माणका लागि टेन्डर हुदैछ । पहिलो चरणमा ६८ करोड ५ लाख ९८ हजार ७ सय ४ रुपैयाँको ठेक्का कालिका कन्स्ट्रक्सन पाएको छ ।
पहिलो चरणमा ठेक्का पाएको कालिका कन्स्ट्रक्सन ले ७ वटा सडक निर्माण गर्ने छ । जस अन्तरगत चरणमा गुल्म –चर्च रोड (२ हजार ७ मिटर) , धनगढी मेन रोड , ट्राफिक चौराहा देखि –कैलाली नाला ( १ हजार ३ सय ८० मिटर) , हुलाकी सडक–क्याम्पस रोड– जाखोरताल ( ७ सय मिटर) , क्याम्पस रोड– चटकपुर ( ३ हजार ६ सय ५० मिटर) , धनगढी – खुटिया स्याउले रोड ( ८ सय ७० मिटर ) , मालपोत रोड ( ४ सय ३० मिटर र हसनपुर रोड ( १ हजार १ सय ५० मिटर) रहेका छन् ।
क्षेत्रीय सहरी विकास आयोजना धनगढी विकासको सपना बोकेको आयोजना हो नगरप्रमुख वडले भने, त्यसैले नगरवासीको सपना पनि यस आयोजना सँग जोडिएको छ । क्षेत्रीय शहरी विकास आयोजना अन्तरगत धनगढीमा सडकको शिलान्यास गरेपछि नगरप्रमुख वड निकै प्रफुल्लित मुद्रामा देखिन्थे ।
धनगढी उप–महानगरपालिकाका उप–प्रमुख सुशीला मिश्र भट्टले नगरको विकासका लागि नगरवासीले हातेमालो गर्नुपर्ने बताईन । उनले भनिन्, ठुलो आयोजना हो कार्यान्वयनमा सबैले सहयोग गरौँ । उप–प्रमुख भट्टले क्षेत्रीय शहरी विकास आयोजनाले लैङ्गिक अवधारणालाई पनि आत्मसाथ गरेर काम गरिरहेको बताइन । क्षेत्रीय शहरी विकास आयोजना उप–व्यवस्थापक श्याम चन्द्र बुढाथोकीले समयमै काम निर्धारित समयमा नै काम सम्पन्न हुनेमा ढुक्क रहेको बताए । उनले भने, सुरुमा ठेक्का प्रक्रियामा केही समस्या भएर काममा केही ढिलाइ भएको हो , सबै काम समयमा सम्पन्न हुनेमा ढुक्क छौँ । धनगढी उप–महानगरपालिकाका डिभिजनल इन्जिनियर दिजराज भट्टले सडक बिस्तारका लागि स्थानीयहरूले पनि सहयोग गर्न थालेको बताए । उनले भने, सडक क्षेत्राधिकार भित्र पर्ने संरचना भत्काउने घरधनीलाई सम्मान गर्ने, करमा छुट गर्ने, भत्काइएको घर नक्सामा छुट दिने, रंगरोगनमा सहयोग गर्ने जस्ता कार्यक्रमहरू ल्याएका छौँ । सडक शिलान्यास कार्यक्रमको अध्यक्षता धनगढी उप–महानगरपालिका वडा नं ४ का अध्यक्ष दीपक कुमार थापाले गरेका थिए ।
