मेरो समाज र देश !
अनजान, अन्धो बस्तीमा
उज्यालो उन्मुख पाइलाहरू
खाल्डोमा परिरहेछन्
नउम्किने गरी।
गरिब गुरुवाहरूका
रसाएका आँखा
पुछिन नपाउँदै
बज्र प्रहार भई रहेछन्
ब्युँतिन नदिने गरी।
विश्वास र आश्वासन
आश्वासन अनि धोका
धोका अनि आर्तनाद,
ती गरिब गुरूवाहरूको दुर्भाग्य!
वैचारिक द्वन्द्वको कुनै अर्थ नरहने समाजमा
रगताम्य आला घाउहरूले
मलम पट्टी नपाउँदै
अर्को प्रहार भइरहेको छ
रगत नरोकिने गरी।
विकृत राजनीति
अस्थिर सरकार
आर्थिक रूपान्तरणको नारा
नाङ्गो नाच नाचिरहेका अगुवा
जनता सबै बेसहारा।
यस्तै छ
मेरो समाज र देशको दशा।
डा. हेम राज पनेरु
उप-प्राध्यापक एवं इन्टेन्सिभिस्ट (आइसियु फिजिसियन), त्रि. वि. शिक्षण अस्पताल काठमाडौँ
