धनगढी–बझाङमा जिप दुर्घटनामा परेर निधन भएका सुदूरपश्चिमका आन्तरिक मामिला तथा कानुन मन्त्री पृथ्वीबहादुर सिंहको पार्थिव शरीरमा राष्ट्रिय झन्डा ओढाएर श्रद्धाञ्जली ब्यक्त गरिएको छ ।
धनगढी रङ्गशालामा राखिएको सिंहको पार्थिव शरीरमा सुदूरपश्चिम प्रदेशका प्रदेश प्रमुख देवराज जोशी, मुख्यमन्त्री कमलबहादुर शाह र सभामुख भीमबहादुर भण्डारीले राष्ट्रिय झन्डा ओढाएर श्रद्धाञ्जली दिएका हुन । श्रद्धाञ्जली सभामा प्रदेशका मन्त्रीहरू, निवर्तमान मुख्यमन्त्री, पूर्व मुख्यमन्त्री,पूर्व सभामुख प्रदेश सभा सदस्यहरू, नगरप्रमुख लगायत ठुलो सङ्ख्यामा उपस्थित सयौँ आफन्त, शुभचिन्तक, तथा राजनीतिक दलका नेता कार्यकर्ताहरूले श्रद्धाञ्जली अर्पण गरे । मन्त्री सिंहको पार्थिव शरीर दाहसंस्कार लागि आजै नेपाली सेनाको हेलिकोप्टरबाट गृह जिल्ला बझाङ लगिएको छ ।
दुर्घटनामा घाइते भएकी मन्त्री सिंहकी श्रीमती अमृतादेवी सिंह र भाउजू जयादेवी सिंहको बझाङमै मृत्यु भएको थियो । मन्त्री सहितका तीनै जनाको दाहसंस्कार बझाङमै गरिने छ ।
मन्त्री सिंह चढेको जिप डडेलधुराबाट मङ्गलवार बझाङ जाँदै गर्दा बझाङकै केदारस्युँ गाउँपालिकामा दुर्घटनामा परेको थियो ।
