धनगढी–चुरे क्षेत्र सँग जोडिएको कैलालीको गोदावरी नगरपालिका–१२ मा पर्ने रातो पानी सामुदायिक वनमा व्यापक फडानी भएको छ । झण्डै एक सय जति सालका हरिया र सुकेका रुख काटेर वनभित्रै चिरान गरेर तस्करी भएको हो । सामुदायिक वनका अध्यक्ष कैलाश विक र केही वन कर्मचारीको संलग्नतामा सो क्षेत्रमा पछिल्लो समय व्यापक वन फडानी तीव्र रुपमा भइरहेको स्थानीले बताएका छन् ।
वन फडानीमा संलग्न दुइ जनालाई स्थानीयले पक्राउ गरेर वन कार्यालय लाइ बुझाएका छन् । पक्राउ पर्नेमा सामुदायिक बनका अध्यक्ष कैलाश विकका भाइ कर्ण वहादुर विक र स्थानीय टेक राज ओझा छन् । दुवै जना माथि वन मुद्दा दायर गर्ने तयारी भएको इलाका वन कार्यालय अत्तरियाका अधिकृत निरञ्जन कडालले बताए । सो क्षेत्रमा एक सय नब्बे क्यूफिट काठ बरामद भएको उनले बताए । सो क्षेत्रमा ठुलो मात्रामा सालको रुख कटानी भएको उनले स्विकारे । करिब ९० देखि एक सय वटा सम्म सालका रुख काटिएको उनले जानकारी दिए । तस्करहरूले वन भित्रै चिरान गरेर समिलहरुमा काठ बेच्ने गरेको पाइएको छ ।
रातो पानी सामुदायिक वन चूरे क्षेत्रको महत्त्वपूर्ण भावर हो । उक्त वनमा लामो समय देखि भइरहेको अवैध फडानी र तस्करीका विषयमा स्थानीयले पटक–पटक वन कार्यालयमा जानकारी दिँदा पनि चासो नराखेपछि उपभोक्ताले स्वयम पक्राउ गरी बनकर्मीलाई जिम्मा गाएका हुन । स्थानीय बासिन्दाले वन फडानी सँगै तस्करहरूले बँदेल,चित्तल लगायतका वन्यजन्तु समेत सिकार गर्ने गरेको बताएका छन । सामुदायिक वनका अध्यक्ष कैलाश विकको प्रत्यक्ष संलग्नतामा चोरी तस्करी भइरहेको भन्दै स्थानीय उपभोक्ताले उनको राजीनामा माग गरेका छन् ।
