धनगढी– जनप्रतिनिधिका कामले उसको चौतर्फी चर्चा हुने गर्छ । आफ्नो क्षेत्रमा उनीहरूले पुराएको योगदानकै कारण कसैको चर्चा सर्वत्र चुलिएको छ भने कति गुमनाम छन् । धनगढी उपमहानगरपालिकाका मेयरले एक वर्ष अवधिमै जनताको प्रशंसा यसरी जित्दै गएका छन् कि जसको थोरै काममा पनि जनता खुसी छन् ।
चुपचाप काम गरेका तर चर्चाको भोको नरहेका यस्तै जनप्रतिनिधि भित्र पर्छन् धनगढी उपमहानगरपालिकाका मेयर गोपाल हमाल । हो, हमालले आफू निर्वाचित भएपछि गुणगान गाउन त्यति धेरै काम गरेनन् तर उनका सीमित कामले पनि उनका मतदाताहरु खुसी हुँदै गएका देखिन्छन् । उनले काठमाडौँका मेयर वालेन्द्र शाह र धरानका मेयर हर्क साम्पाङ भन्दा धेरै काम गरेका छन् तर चर्चा कम हुँदा उनले गरेका कामले राष्ट्रिय चर्चा बटुल्न सकेको छैन ।
नगरवासीको समस्यालाई मनन गरेर नगरभित्र हुने आकस्मिक सेवालाई सहजता दिन नगर प्रहरीको व्यवस्था गरेका छन् । यति मात्र हैन स्वतन्त्र रुपमा निर्वाचित भए लगत्तै तलब भत्ता देखि सवारी साधन त्यागेका स्वतन्त्र नगर प्रमुख हमालले नगरवासीको हितमा एक पछि अर्को नयाँ काम गर्दै आएका छन । तालीम प्राप्त नगर प्रहरीलाई आवास सहित चौबिसै घण्टा खटिनका लागी लागी कार्यालय भित्रै व्यवस्था मिलाइएको छ ।
समस्या परेमा उपमहानगरवासिले जुनसुकै बेला निःशुल्क नम्बर १८१०५००००९० वा ०९१–५९०६९० मा फोन गरेर सेवा लिन सक्ने छन् ।
छोटो अवधिमै उपमहानगरपालीकोले नगर बासीलाई प्रत्यक्ष लाभ हुने गरी गरिएको व्यवस्था प्रति नगरवासीले खुसी व्यक्त गरेका छन् । उनीहरूले कार्यान्वयन पक्ष चुस्त बनाउन नगर प्रमुख लाइ आग्रह गरेका छन् । हमालको सादगीपन बाहिर देखाउनकोलागि मात्र नभएर भित्र पनि उनी जनताको समस्यामा मलम लगाउने खालको रहेको धनगढी–३ का स्थानीय बासिन्दा तथा समाजसेवी दिब्यराज लम्साल बताउँछन् ।
धनगढीको सडक चौडा गर्ने देखि प्लास्टिक मुक्त धनगढी बनाएका नगर प्रमुख हमाल अहिले धनगढी लाइ हरियाली बनाउन अहोरात्र खटिएका छन् । कैलाली भन्सार देखि गेटा सम्म सडकको बिच भाग र पैदल मार्गमा उनी हरियाली बनाउन बिरुवा रोपी रहेका छन् । जसमा स्थानीय नगरवासी मात्र नभई विदेशमा रहेका नागरिकले समेत पाँच हजार देखि एक लाख सम्म सहयोग गरेका छन् । इच्छुक सहयोग दाताको नाम बिरुवा घेर वार गर्न बनाइएको ठाउँमा लेख्ने गरिएको छ ।
यो अभियानमा पाँच दिनमा २४ लाख रुपैंया सहयोग भएको नगर प्रमुख गोपाल हमालले जानकारी दिए ।
मैले यति धेरै सहयोग होला भन्ने सोचेको पनि थिइन हमालले भने –सामाजिक सञ्जालमा एक दुइ जनाले सहयोग गरेको कुरा राखेर आफूले धनगढी उप–महानगरपालिका द्वारा हरियाली प्रवर्द्धन गर्ने र धनगढीलाई पर्यावरण मैत्री बनाउने उद्देश्यका साथ अभियान सञ्चालन गरेको बताए पछि अभूतपूर्व सहयोग प्राप्त भयो यसले मलाइ थप काम गर्ने हौसला मिलेको छ ।
एक वर्ष भित्रै धनगढी उपमहानगरले मेयर गोपाल हमाल को नेतृत्वमा केही प्रमुख कामहरू:–
रातीको समयमा सुत्केरी र बिरामी अस्पताल पु¥याउनु परे एम्बुलेन्स सहित नगर प्रहरी ।
घर भित्र सर्प पसे तालिम प्राप्त नगर प्रहरी ।
मृतकलाई घाट पु¥याउन शव वाहनसहित नगर प्रहरी ।
आगलागी भयो दमकल सहित नगर प्रहरी ।
कतै रुख ढल्यो बन्चरो सहित नगर प्रहरी ।
डुबान भए लाइफ ज्याकेट र बोट सहित नगर प्रहरी ।
१९ वटै वडामा विशेषज्ञ डाक्टर सहितको निःशुल्क स्वास्थ्य सेवा ।
धनगढीलाई हराभरा बनाउन लाखौँ बिरुवा रोपिँदै ।
चौराहा देखि कैलाली पुल र कैलाली पुल देखी क्याम्पस रोड आधुनिक सडकको निर्माण सुरु ।
चौराहा देखि भन्सार सम्म स्मार्ट बत्ती जडान हुँदै ।
चौराहा देखि गेटासम्म हरियाली र झिलिमिली ।
त्यसो त एउटा नगरप्रमुखले चाहेको खण्डमा धेरै गर्न सक्छ भन्ने दृष्टान्त काठमाडौं महानगरका मेयर बालेन साहको लोभलाग्दो कामले देखाउँदै लगेको छ । धनगढी उपमहानगरका मेयरले पनि निस्वार्थ भावले गर्न सक्ने हो भने गर्न पर्ने अथाह छ । त्यसो भयो भने मात्रै आम मतदाताले आफ्नो मतको कदर भएको आभास गर्नेछन् अन्यथा सस्तो लोकप्रियता कोलागि मात्रै रमायो भन्ने आरोप तिनै जनप्रतिनिधि प्रति लाग्ने दिन नआओस् । यही कामना ।
