धनगढी–पछिल्लो समय धनगढीलाई हरियाली बनाउन अहोरात्र खटिएका धनगढी उपमहानगरपालिकाका नगर प्रमुख गोपाल हमालले आज फेरी देशमै नमुना काम गरेका छन् । धनगढीमा एकै पटक करिब १८ सय बिरुवा रोपेर उनले पर्यावरण संरक्षणका लागी देशमै उदाहरणीय काम गरेका हुन् । धनगढी उपमहानगरपालिकाले शनिवार एकै पटक १ हजार ७९५ बिरुवा रोपेको हो । हरियाली धनगढी अभियान अन्तर्गत क्याम्पस चोकदेखि मनेहरा कालिका मन्दिर अगाडी सम्मको सडक क्षेत्रमा वृक्षारोपण गरिएको हो । बिरुवा रोप्न सयौँ नगरवासी स्वतःस्फूर्त रुपमा सहभागी भएका थिए । वृहत् वृक्षारोपण गर्न विभिन्न वडाका वडा अध्यक्ष, सदस्यहरू, विभिन्न विद्यालयका विद्यार्थी, शिक्षक, पतञ्जलि योग समूह, टोल सुधार समिति, सरसफाइ समिति र सर्वसाधारणको सहभागिता थियो । नगर उपप्रमुख कन्दकलाकुमारी रानाले वृक्षारोपणको उद्घाटन गरेका हुन् । हरियाली धनगढी अभियान थालेका धनगढी उप–महानगर पालिकाका नगरप्रमुख गोपाल हमालले यस अघि सडक आसपासमा हजारौँ बिरुवा हुर्काएका छन् । पछिल्लो समय रुख बिरुवा रोप्ने तर हेरचाह नगर्दा सबै सुकेर जाने समस्या छ । तर नगर प्रमुख हमालले वैशाख जेठको खडेरीमा पनि ट्याङ्कर वाट पानी बोकेर बिरुवा हुर्काएका छन् । अहिले धनगढीको छ लेन सडक पुरै हरियाली देखिन थालेको छ । अबको केही वर्षमा यो सडक निकै आकर्षक देखिने छ । त्यति मात्रै होइन पछिल्लो समय जलवायु परिवर्तनका कारण पानीका मुहान,हेन्डपम्प र वोरीङ सुक्न थालेपछि उनले पुराना ताल तलैया उत्खनन गरेका छन् । धनगढीको फोहर मैला व्यवस्थापन, विकाश निर्माण सँगै पर्यावरण संरक्षण हमालको पहिलो प्राथमिकतामा छ । सबै सामुदायिक वनहरूमा एउटा पोखरी बनाउने हमालको योजना छ । त्यसका लागी हातेमालो गर्न नगरप्रमुख हमालले सबैलाई अनुरोध गरेका छन् ।
