धनगढी– धनगढीको नोभा अस्पतालमा मृत्यु भएका नसिब चौधरीका परिवारलाई साढे १३ लाख क्षतिपूर्ति दिने सहमतिपछि आफन्तले शव बुझेका छन् ।
अस्पताल प्रशासन र पीडितका आफन्तबीच आज (शनिबार) बेलुकी सहमति भएपछि आफन्तले शव बुझेका हुन् ।
कञ्चनपुरको बेलौरी नगरपालिकाका १७ वर्षीय नसिबको अस्पतालको लापरबाहीका कारण मृत्यु भएको भन्दै आफन्तजनले ढुंगामुढा प्रहार गर्दै तोडफोड गर्न थालेपछि केही समय तनाव भएको थियो । स्थिति नियन्त्रणमा लिन प्रहरीले ९ सेल अश्रुग्यास प्रहार गरेपछि भिड तितरबितर भएको थियो ।
जन्डिसको समस्या लिएर गत साउन ७ गते अस्पताल भर्ना भएका चौधरीको शुक्रबार दिउँसो ३ बजे मृत्यु भएको थियो । शुक्रबार अवस्था जटिल बनेपछि मात्र अस्पतालले नेपालगन्ज वा भारतको बरेली लैजान भनेको मृतकका आफन्तले बताएका छन् ।
दिउँसो करिब साढे ३ बजे नेपालगन्ज लैजान एम्बुलेन्समा राख्ने क्रममा चौधरीको मृत्यु भएको थियो । आफन्तले अस्पतालको लापरबाहीका कारण उनको मृत्यु भएको भन्दै शव बुझ्न मानेका थिएनन् । साँझ दुईपक्षीय सहमतिपछि आफन्तजनले शव बुझेका हुन् ।
