धनगढी–इन्डियन प्रिमियर लिग (आईपीएल) मा सट्टा बाजी गरेको आरोपमा धनगढीबाट एक जना व्यापारी लाई प्रहरीले पक्राउ गरेको छ । धनगढी चटकपुरमा रहेको प्रीति ट्रेडिङ्ग एन्ड सप्लायर्सका सञ्चालक ३७ वर्षीय सञ्जीव गुप्ता लाइ पक्राउ गरिएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक प्रतीक विष्टले बताए ।
धनगढीका विभिन्न व्यक्तिलाई सट्टा बाजी खेल खेलाउने गरेको भन्ने गोप्य सूचनाका आधारमा उनलाई पक्राउ गरिएको विष्टले बताए । कुनै खेलाडी आउट भएमा, खेलाडीले रन बनाएमा, चौका छक्का भएमा, विकेट गएमा, टिमले जितेमा वा हारेमा समेत अनलाईन मार्फत रकम दाउमा लगाई ठुलो रकम लेनदेन गर्ने गरेको प्रहरीको भनाइ छ ।
उनको साथबाट सट्टा बाजी गर्न गराउन प्रयोग गरेका २ थान मोबाइल समेत बरामद गरिएको प्रहरीले जनाएको छ । कैलाली जिल्ला अदालतबाट जुवा (सट्टा बाजी) मुद्दामा म्याद थप भई उनी माथि थप अनुसन्धान भइरहेको प्रहरी नायब उपरीक्षक विष्टले बताए ।
सट्टा बाजी गरेको आरोपमा पक्राउ परेका सञ्जीव गुप्ता
