धनगढी–कोरोना विरुद्धको मोर्चामा अग्र पङ्क्तिमा खटिएका डोटीको जोरायल गाउँपालिका–२ स्थित छतिवन स्वास्थ्य चौकीमा कार्यरत अहेब लक्ष्मी प्रसाद जोशी लाई कोरोना सङ्क्रमण पुष्टि भएको छ ।
सेती प्रादेशिक अस्पतालको प्रयोगशालामा गरिएको परीक्षणमा सोमबार सङ्क्रमण पुष्टि भएको जोशीले बताए ।
उनी अहिले होम आइसोलेसनमा छन् । केही दिन अघि ज्वरो आउने टाउको र शरीर दुख्ने समस्या देखिए पछि उनी बिदा लिएर घर आएका थिए ।
घरेलु औषधि खाँदा पनि सन्चो नभएपछि परीक्षण गर्दा पोजेटिभ देखिएको उनले बताए ।
अहिले ज्वरो र शरीर दुख्न कम भए पनि रुघा खोकी लागी रहेको उनले बताए ।
सामाजिक सञ्जाल फेसबुकमा स्ट्याटस लेख्दै जोशीले भनेका छन्–
कोरोना विरुद्धको मोर्चामा खटिँदै गर्दा म आफै कोरोना बाट सङ्क्रमित भएको छु, हाल सामान्य रुघाखोकी बाहेक स्वास्थ्य अवस्था सामान्य रहेको जानकारी गराउन चाहन्छु ।
यस बिच मेरो प्रत्यक्ष सम्पर्कमा आउनुभएका सम्पूर्ण मित्रहरूलाई विशेष सावधानी अपनाउनु हुन समेत हार्दिक अनुरोध गर्दछु ।
