कसरी लेखूँ मायाका कथा, प्रीतिका कविता !
थकित शरीर
व्याकुल मन
भाँडिएका सपना।
एक्लिएको बसाइ
कोभिडको ताण्डव।
मरुभूमिमा बिराएको बाटो झैँ
अनवरत हिँडिरहेको छु
बेपरवाह गन्तव्यको।
कसरी लेखूँ म
मायाका कथा
प्रीतिका कविता
कालको मुखबाट
निरीह आत्माहरू खोस्न
लागिपरेको बेला।
युद्ध मैदानझैँ लाग्ने अस्पतालमा
तैनाथ रहेको बेला।
समय कहाँ छ र
गाँस्न मायाप्रीति।
प्रत्येक पाइलामा
उद्वेलित मन
आर्तहरूका चित्कार
अनि
चारैतिर
काला बादलहरू
मडारिरहेको बेला।
मृत्युको सन्त्रास
छाएको बेला।
कसरी लेखूँ म
मायाका कथा
प्रीतिका कविता
विजयको आशामा
रणभूमिको सिपाही झैँ
हरपल
लडिरहेको बेला।
भोक प्यास
केही होस नभएको बेला।
कसरी लेखूँ म
मायाका कथा
प्रीतिका कविता।
डा. हेम राज पनेरू
धनगढी,कैलाली
हाल उप–प्राध्यापक तथा क्रिटिकल केयर (आइसियु) फिजिसियन
त्रि.बि.शिक्षण अस्पताल, काठमाडौँ
मङ्सिर १३, २०७७
